கிராவிட்டியும் ஆஸ்காரும்

கடந்த ஆண்டு வெளியான லைஃப் ஆப் பை படத்திற்கும் இந்த ஆண்டு வெளியாகி வெற்றிகரமாக ஓடிக்கொண்டிருக்கும் கிராவிட்டி படத்திற்கும் ஒரு ஒற்றுமை உண்டு. நடுக்கடலில் தன்னந்தனியாக தத்தளிக்கும் சிறுவனை பற்றிய படம் லைஃப் ஆஃப் பை. விண்வெளியில் உயிருக்கு போராடும் பெண்ணை பற்றிய சயின்ஸ் பிக்ஷன் படம், கிராவிட்டி. இரண்டு படங்களுமே, தன்னம்பிக்கை இருந்தால் எத்தகைய ஆபத்தான சூழலையும் எதிர்கொள்ளலாம் என்ற கருத்தையே முன்வைக்கின்றன. லைஃப் ஆப் பை பல ஆஸ்கார் விருதுகளை குவித்தது போல கிராவிட்டி படமும் வரவிருக்கும் ஆஸ்கார் விழாவில் ஏராளமான விருதுகளை குவிக்கும் என எதிர்பார்க்கப்படுகிறது.

சயின்ஸ் பிக்ஷன் படம் என்றதும் புரியாத பல அறிவியல் கோட்பாடுகளை விவரித்து நம்மை குழப்புவார்கள் என எண்ணவேண்டாம். இது மிகவும் எளிமையான லீனியரான திரைப்படம். படத்தில் அறிவியல் கோட்பாடுகளை விட ஆன்மிக கருத்துக்களும், தத்துவங்களுமே அதிகம் இருக்கின்றன.

விண்வெளி வீரர் மாட் கௌலஸ்கி (ஜார்ஜ் க்லூனி) தன்னுடைய கடைசி விண்வெளி பயணத்தை வெற்றிகரமாக முடித்துவிட வேண்டும் என்று கனவுகண்டு கொண்டிருக்க, விண்வெளியில் ஏற்படும் விபத்தால் விண்கலம் பழுதாகிறது. அவரது குழுவில் இருக்கும் அனைவரும் இறந்து போக, அவரும் டாக்டர் ரியான் ஸ்டோன் (சாண்ரா புல்லக்) மட்டும் உயிர் பிழைக்கின்றனர். ரியான் ஸ்டோனிற்கு அது முதல் விண்வெளி பயணம்.  எப்படியாவது அங்கிருந்து தப்பித்துவிட வேண்டும் என இருவரும் முடிவுசெய்கின்றனர். ஒரு கட்டத்தில் யாராவது ஒருவர் தான் பிழைக்க முடியும் என்ற சூழ்நிலை ஏற்பட, மாட் தன் உயிரை தியாகம் செய்கிறார். இறுதியில் ரியான் ஸ்டோன் தனியாக போராடி பூமியை எப்படி அடைகிறார் என்பதே படத்தின் மீதிக் கதை. படத்தின் கதை முழுக்க விண்வெளியில், பூமிலிருந்து 600 கி.மீ உயரத்தில், நடக்கிறது. அங்கே எல்லாம் மிதந்துகொண்டே இருக்கின்றன. கதாபாத்திரங்களும் மிதக்கின்றனர். நேர்த்தியான, மிகவும் புதுமையான ஒளிப்பதிவின் மூலம் விண்வெளியில் மிதக்கும் உணர்வை பார்வையாளர்களுக்கும் ஏற்படுத்தி இருக்கின்றனர்.

முழு படத்தையும் தன் தோளில் சுமக்கிறார் படத்தின் கதாநாயகி சாண்ரா புல்லக். இரண்டு காட்சிகளில் மட்டுமே அவரின் முகத்தை தெளிவாக பார்க்க முடியும். மற்றபடி படம் முழுக்க ஸ்பேஸ் சூட் அணிந்தே நடித்திருக்கிறார். வெறும் வாய்ஸ் மாடுலேஷன் மூலமும், உடல் அசைவு மூலமும் விண்வெளியில் உயிருக்கு போராடும் பெண்ணின் மனநிலையை அருமையாக வெளிப்படுத்தியிருக்கிறார். முழு படத்தையும் ஒரு சிறிய கியூப் செட்டில் உருவாக்கியுள்ளனர். அதனால் ஒவ்வொரு நாளும் பத்து மணிநேரத்திற்கு மேல் அந்த கியூப் பெட்டிக்குள்ளேயே அடைந்து கிடக்க வேண்டுமாம். அவ்வளவு மெனக்கெட்டு அவர் சிறப்பாக நடித்திருப்பதனால் அடுத்த ஆண்டு சிறந்த நடிகைக்கான ஆஸ்கார் விருதை அவர் வெல்வார் என பலரும் எதிர்பார்க்கின்றனர். படத்தின் துணை கதாபாத்திரத்தில் நடித்திருக்கும் ஜார்ஜ் க்லூனி மீண்டும் தான் ஒரு தேர்ந்த நடிகர் என்று நிரூபித்திருக்கிறார். கேலியாக பேசுவது தொடங்கி, ரியான் ஸ்டோனிற்கு மனதைரியம் ஊட்டும் வகையில் பேசுவது வரைக்கும், முதிர்ச்சியான நடிப்பை வெளிப்படுத்துகிறார்.

இந்த படத்தை தத்ரூபமாக உருவாக்க வேண்டும் என்பதற்காக கிட்டதட்ட நான்கரை வருடங்கள் போராடியிருக்கிறார் இந்த படத்தின் இயக்குனர் அல்ஃபோன்சா கௌரான். இவர் தன் மகன் ஜோனா கௌரானுடன் இணைந்து இப்படத்தின் திரைக்கதையை எழுதியுள்ளார். கிராவிட்டி தன்னுடைய கனவு திரைப்படம் என்று குறிப்பிடும் இவர், இந்த படத்திற்கென பிரத்தியேகமாக பல புதிய தொழில்நுட்பங்களை கண்டுபிடித்ததாகவும் குறிப்பிடுகிறார். இந்தபடத்தின் மூலம் உலகின் தலை சிறந்த இயக்குனர்கள் பட்டியலில் இவர் இடம்பிடித்திருப்பதில் ஆச்சர்யம் ஒன்றுமில்லையே !

படத்தின் மிக பெரிய பலம் ஒலிவடிவமைப்பு. டால்பி அட்மோஸ் என்ற புதிய தொழில்நுட்பத்தை பயன்படுத்தி ஒலிப்பதிவு செய்துள்ளனர். உண்மையில் விண்வெளியில் ஒலி இருக்காது. ஒரு பொருளை தொடுவதன் மூலம் எழும் அதிர்வலைகளின் மூலம் தான் சப்தத்தை உணர்ந்து கொள்ள முடியும். இதை கருத்தில் கொண்டு மிகவும் வித்தியாசமான முறையில் ஒலிவடிவமைப்பு செய்திருக்கிறார்கள். இந்த படத்தை முப்பரிமாண ஒளி-ஒலி தொழில்நுட்ப வசதி கொண்ட திரை அரங்கில் பார்த்தால் இந்த வித்தியாசத்தை உணரலாம். மேலும் டால்பி நிறுவனமும் இந்த படத்தின் மூலம் அதிக லாபம் அடைந்திருக்கிறது. கிராவிட்டி படம் பெரும் வெற்றிபெற்றுவிட்டதால், பல ஹாலிவுட் படைப்பாளிகள் தங்களின் படங்களில் அட்மோஸ் தொழில்நுட்பத்தை பயன்படுத்த ஆர்வம் காட்ட தொடங்கிவிட்டனர்.

இது ஒருபுறமிருக்க, வெறும் தொழில்நுட்பத்தை மட்டும் நம்பி படத்தை எடுக்காமல், பல தத்துவங்களையும் படத்தில் புகுத்தியிருக்கிறார் இயக்குனர். யாருக்காக ஒரு மனிதன் வாழ வேண்டும், மனிதனுக்கு அப்பாற்பட்ட சக்தி ஒன்று இருக்கிறதா, என்பன போன்ற பல கேள்விகளுக்கு ரியான் ஸ்டோன் கதாபாத்திரம் மூலம் பதில் சொல்லியிருக்கிறார் இயக்குனர். மற்ற சயின்ஸ் பிக்ஷன் படங்கள் போல் வெறும் பிரம்மாண்டத்திற்கு மட்டும் முக்கியத்துவம் கொடுக்காமல், தனிமை, நம்பிக்கை, அன்பு, பாசம் போன்ற விடயங்களுக்கும் முக்கியத்துவம் கொடுத்திருப்பது படத்திற்கு பலம்.

ஹாலிவுடில் பிரம்மாண்டமான படங்கள் பல எடுக்கப்பட்டாலும், வெகுசில படங்கள் மட்டுமே உலக அளவில் பிரபலமாகின்றன. உலக அளவில் ஒரு படம் கொண்டாடப் படவேண்டுமெனில், அந்த படத்தின் கதை அனைத்து தரப்பு மக்களாலும் ரசிக்கும்படி இருக்க வேண்டும். மேக்கிங்கும் அசாத்திய தரத்தில் இருக்க வேண்டும். டைட்டானிக், ஜூராசிக் பார்க், அவதார் போன்ற படங்களை இதற்கு உதாரணமாக சொல்லலாம். அந்தவகையில் இப்போது உலக சினிமாவில் இன்னொரு மைல்கல்லாக அமைந்துவிட்ட கிராவிட்டி ஆஸ்கார் பந்தயத்தில் வெற்றி பெறுகிறதோ இல்லையோ பலகோடி மக்களின் மனதை ஏற்கனவே வெற்றிக்கொண்டுவிட்டது.

தி காஞ்ஜூரிங்

நன்றி ஆழம் 

உண்மை சம்பவங்களை அடிப்படையாக கொண்டு எடுக்கப்படும் பேய் படங்களுக்கு எப்பொழுதுமே மவுசு அதிகம். அந்த வகையில், அமெரிக்காவில் நடந்த ஒரு உண்மை சம்பவத்தின் திரை வடிவமே, அண்மையில் வெளியான, தி காஞ்ஜூரிங். உலகளவில் பெரும் வரவேற்ப்பை பெற்றுவரும் இந்த படத்தில் அப்படி என்ன தான் இருக்கிறது என்று பார்த்துவிடுவோம்.

பெரோன் தம்பதியர், தங்கள் ஐந்து மகள்களுடன் புது வீட்டிற்கு குடி புகுகிறார்கள். ஆனால் அவர்களின் செல்ல நாய் மட்டும் வீட்டிற்குள் காலடி எடுத்து வைக்க மறுக்கிறது. அவர்கள் அதை பெரிதாக எடுத்துக் கொள்ளமால், புது வீட்டில் முதல் நாள் பொழுதை சந்தோசமாக கழிக்கின்றனர். மறுநாள் அவர்களின் செல்ல நாய் வாசலில் இறந்து கிடக்கிறது. அன்றிலிருந்து, தினமும் அதே இடத்தில், புறாக்கள் செத்து விழுகின்றன.  வீட்டில் உள்ள அனைத்து கடிகாரங்களும், விடியற் காலை 3.07-க்கு நின்று விடுகின்றன. சுவற்றில் மாட்டப்பட்டிருக்கும் படங்கள் கீழே விழ தொடங்குகின்றன. வீட்டினுள் ஏதோ கெட்ட சக்தி இருக்கிறது என்பதை அவர்கள் மிகவும் தாமதமாக புரிந்து கொள்கின்றனர்.

என்ன செய்வது என்று தெரியாது விழிக்கும் பெரோன் தம்பதியர், இறுதியில் அமானுஷ்ய சக்திகளை பற்றி ஆராய்ச்சி செய்யும், வாரன் தம்பதியரின் உதவியை நாடுகிறார்கள். அவர்கள் வீட்டிற்கு வந்து ஆராய்ச்சி செய்த பின்னர் தான் தெரிகிறது, வீட்டில் ஒரு பேய் மட்டும் இல்லை, பேய்கள் இருக்கின்றன என்று. ஆறு வயது பேய் முதல், 60 வயது பேய் வரை வீட்டினுள் நிறைய பேய்கள் இருக்கின்றன. அதில் சில பேய்கள் நல்ல பேய்கள். அவர்களால் எந்த ஆபத்தும் இல்லை. அந்த வீட்டில் இருப்பதிலே கொடூரமான பேய் பாத்சேபா என்றொரு பெண் பேய். அந்த பேயை வெளியேற்றினால் அந்த வீட்டில் அமைதி திரும்பி விடும் என்று முடிவு செய்கின்றனர் பெரோன் தம்பதியர். பேய் ஓட்ட வேண்டுமெனில், அந்த ஊர் தேவாலயத்திடமிருந்து அனுமதி பெற வேண்டும். அந்த வீட்டினுள் பேய் இருக்கிறது என்பதற்கான ஆதாரங்களை சமர்பித்தால்தான் அனுமதி தருவோம் என்கிறது சர்ச் கமிட்டி. அவர்கள் ஆதாரங்களை தயார் செய்துக் கொண்டிருக்கும் வேலையில், அந்த வீட்டு பெண்மணியான கரோலின் பெரோனுக்கு பேய் பிடித்துவிடுகிறது. அவள் தன் மகள்களையே கொல்ல முயல்கிறாள். இறுதியில் பேய் வென்றதா, இல்லை, வாரன் தம்பதியர் வென்றார்களா என்பதே மீதி கதை.

படத்தின் கதை என்னமோ வழக்கமான பேய் பட கதை தான். ஆனால், அதை சொன்ன விதத்தில் நிறைய வித்தியாசம் காட்டியிருக்கிறார்கள். படத்தில் எதிர்பாராத திகில் தருணங்கள் நிறைய இருக்கிறது. உதரணாமாக, தாயும் மகளும் கண்ணாமூச்சி ஆடும் ஒரு காட்சியில், பேயும் ஆட்டத்தில் சேர்ந்து கொள்கிறது. அது பேய் என்று தெரியும் போது அந்த தாய் மட்டும் நடுங்கவில்லை, பார்ப்பவர்களும் நடுங்குகிறார்கள். இது போன்ற, விறுவிறுப்பான திரைக்கதையோடு, திகிலூட்டும் பின்னணி இசையும், சவுண்ட் எபெக்டஸ்சும் சேர்ந்து கொள்வதால், படம் சீட் எட்ஜ் த்ரில்லராக உருவெடுத்து, நம்மை மிரட்டுகிறது.

உலக சினிமாவில், பல வருடங்களாக பேய் படங்கள் வந்து கொண்டுதான் இருக்கின்றன. ஆனால் காஞ்ஜூரிங் அளவிற்கு சிறந்த படம் வரவில்லை என பலரும் இந்த படத்தை பற்றி பாராட்ட தொடங்கிவிட்டனர். இந்த பாராட்டுக்கள், அனைத்தும் படத்தின் இயக்குனரையே சேரும். இந்த படத்தை மிகவும் சிறப்பாக இயக்கியிருப்பவர் ஜேம்ஸ் வான். இவர், உலகளவில் மிகவும் பிரபலமான ‘சா’ (Saw) படத்தின் மூலம் இயக்குனராக அறிமுகமானவர். இது வரை இவர் எடுத்த எல்லா படங்களும் திகில் படங்களே. அமெரிக்காவில் இந்த படம் அதிக வரவேற்பை பெற்றுள்ளதால் இவரை ஹாலிவுட்டின் ‘ஹாரர் கிங்’ என்று அழைக்க தொடங்கிவிட்டனர். இவருடைய எல்லா படங்களிலும், மரத்தால் செய்யப்பட்ட ஒரு பொம்மை இடம்பெற்றிருக்கும். இந்த படத்திலும் அப்படி ஒரு பொம்மை வருகிறது. அதுவும் தன் பங்கிற்கு நம்மை பயமுறுத்திவிட்டு செல்கிறது.

இந்த படம் மட்டும் சுவாரஸ்யமாக இருக்கவில்லை. படம் உருவான விதமும் சுவாரஸ்யமாகவே இருக்கிறது. 1971-யில் அமெரிக்காவின் ரோட் தீவில் உள்ள ஒரு வீட்டில் நடந்த சம்பவத்தை தான் இப்போது படமாக உருவாக்கி இருக்கின்றனர். அந்த வீட்டில் ஒரு காலத்தில் வசித்த சூனியக்காரி, தூக்கிட்டு தற்கொலை செய்து கொண்டிருக்கிறாள். அவள் தான் அந்த வீட்டில் பேயாக அலைந்து, அங்கே குடியிருந்த அனைவரையும் தொந்தரவு செய்திருக்கிறாள். வாரன் தம்பதியர் (எட் வாரன், லொரைன் வாரன்) தான் அதை கண்டுபிடித்திருக்கிறார்கள்.  அமெரிக்காவில், அமானுஷ்ய சக்திகளை பற்றி ஆராய்ச்சி செய்வதில் பேர்பெற்றவர்கள் இவர்கள். ஹாலிவுட்டில் வந்த சில முக்கிய பேய் படங்கள், இவர்களின் சொந்த அனுபவத்திலிருந்து உருவானவையே. கிட்டதட்ட இருபது ஆண்டுகளாக, பலரும் இந்த படத்தை உருவாக்க முயன்று தோற்றுள்ளனர். இறுதியில் வான் இதற்கு வெற்றிகரமாக திரைவடிவம் கொடுத்துவிட்டார்.

அமெரிக்காவில், ஒரு திரையரங்கில், இந்த படத்தை பார்த்த ரசிகர்கள் பலரும் பயந்து நடுங்கியிருகிறார்கள். அதனால், அந்த திரையரங்க நிர்வாகம், ஒரு பாதிரியாரை வரவழைத்திருக்கிறது. ஒவ்வொரு காட்சி முடிந்ததும், அந்த பாதிரியார், மக்களுக்கு மன தைரியம் ஊட்டும் வகையில், கவுன்சிலிங் கொடுத்து விட்டு போகிறாராம். இது ஒரு மார்கெட்டிங் உத்தி என்கிறார்கள் விமர்சகர்கள்.   

இந்த படம் மிக சிறந்த ஹாரர் படமாக உருவானதற்கு முக்கிய காரணம், இயக்குனரின் தனித்திறமைதான். ஒரு சிறந்த பேய் படம் எப்படி இருக்கவேண்டும் என்பதற்கு இந்த படம் சரியான உதாரணம். பேய் பிசாசு போன்றவற்றில் நம்பிக்கை இல்லாதவர்களுக்கும் இந்த படம் நிச்சயம் பிடிக்கும்.

 

சூப்பர் மேன்-75

உலகின் மிக பெரிய சூப்பர் ஹீரோவாக கருதப்படும் சூப்பர்மேன், முதன்முதலில் வில்லனாகதான் உருவாக்கப்பட்டார் என்றால் நம்பமுடிகிறதா? ஆம். 1933-யில், ஒரு ஆங்கில சிறுகதையில் வில்லனாக அறிமுகமான சூப்பர் மேன் மிக வேகமாக வளர்ந்து ஹீரோவான கதையை பார்க்கும் முன்பு, அண்மையில் வெளியான மேன் ஆப் ஸ்டீல் படத்தை பற்றி பார்த்துவிடுவோம்.

மேன் ஆப் ஸ்டீல், சூப்பர் மேனின் சாகசங்களை மட்டும் மையப்படுத்தி எடுக்கப்பட்ட படமன்று. அனைவரும் அறிந்த சூப்பர் மேன் வரலாற்றை புதிய பாணியில் சொல்லும் படம் இது. க்ரிப்டான் கிரகத்தை சேர்ந்த விஞ்ஞானி, ஜோர்-எல். க்ரிப்டான் அழியப் போகிறது என்று தெரிந்ததும், புதிதாக பிறந்த தன் குழந்தையை விண்கலத்தில் வைத்து வேறு கிரகத்திற்கு அனுப்பி விடுகிறார். அந்த குழந்தை பூமியை வந்து அடைகிறது. அந்த குழந்தையை எடுத்து வளர்க்கும் கென்ட் தம்பதியர், அந்த குழந்தைக்கு கிளார்க் கென்ட் என்று பெயரிடுகின்றனர். தன்னிடம் அசாதாரணமான சக்தி இருப்பதை கிளார்க் உணர்ந்துகொள்கிறான். தன் வளர்ப்பு தந்தையின் மூலம், தான் யார் என்ற உண்மையை அவன் தெரிந்துகொள்கிறான். இந்நிலையில் க்ரிப்டான் கிரகத்தின் வில்லனான, ஜெனரல் ஜாட் கிளார்க்கை கொள்ள பூமிக்கு வருகிறான். கிளார்க், எப்படி அந்த வில்லனை வென்று சூப்பர் மேனாக உருவாகிறான் என்பதை விளக்குகிறது இந்தப்படம்.

பிரபல இயக்குனர் கிரிஸ்டோபர் நோலன், இந்த படத்தின் கதாசிரியர்களில் ஒருவர். பேட் மேன் கதாபாத்திரத்திற்கு புதிய பரிமாணத்தை கொடுத்தவர் இவர்தான். அதே போல் சூப்பர் மேன் கதாபாத்திரத்தையும் நவீனமாக உருவாக்கியுள்ளார். படத்தில் அவரது ‘டச்’ நிறைய இருக்கிறது. திரைக்கதையை நான் லீனியர் முறையில் சொல்லியிருப்பது படத்தின் சுவாரஸ்யத்தை மேலும் கூட்டுகிறது.  இருந்தும் படத்தில் நீளத்தை சற்று குறைத்திருக்கலாம்.

வெறும் சூப்பர் மேனின் சாகசங்களை மட்டும் இந்த படத்தில் எதிர்பார்த்தால் ஏமாற்றமே மிஞ்சும். சூப்பர் மேன் கதாபாத்திரத்தை உலகிற்கு மீண்டும் அறிமுக படுத்துவதே இந்த படத்தின் முக்கிய நோக்கம். அதனால், அவரது சாகசத்திற்கு அதிக முக்கியத்துவம் தரப்படவில்லை. ஆனால் நிச்சயம் புதிய பரிமாணத்தில் இன்னும் சில சூப்பர் மேன் படங்கள் வருங்காலத்தில் வரும் என நாம் எதிர்பார்க்கலாம்.

1933-ஆம் ஆண்டு ஜெர்ரி, ஜோ என்ற இரண்டு நண்பர்களால் உருவாக்கப்பட்ட கதாபாத்திரமே ‘சூப்பர்மேன்’. அவர்கள், தி ரெயின் ஆப் சூப்பர்மேன் (The Reign of Superman) என்ற சிறுகதையில் ‘சூப்பர் மேன்’ என்றொரு வில்லனை உருவாக்கினார்கள். அவன் உலகத்தையே கட்டி ஆள முயல்கிறான். அந்த கதாபாத்திரம் அதிகம் பேசப்படாததால், அவனை ஹீரோவாக மாற்றி, 1938 ஆம் ஆண்டு முதல் சூப்பர் மேன் காமிக்கை வெளியிட்டார்கள். அன்றுமுதல் இன்றுவரை, 75 வருடங்களாக உலக ரசிகர்களை கவர்ந்து வருகிறார் ‘சூப்பர் ஹீரோ’ சூப்பர்மேன்.

தொடக்கத்தில் சூப்பர் மேனும் ராபின் ஹூடை போல ஒரு சாதாரண கதாபாத்திரம் தான். சட்டத்துக்கு கட்டுபடுவதை விட, நியாயத்திற்க்கு கட்டுப்படுவதை தான் அவர் விரும்புவார். சூப்பர்மேனை உருவாக்கிய ஜெர்ரி, ஜோ ஆகியோர் இடது சாரிகள் என்பதால், ஆரம்ப கால சூப்பர் மேனும் இடது சாரியாகவே இருந்தார். மேலும் அவரிடம் பறக்கும் சக்தி இருக்கவில்லை. பின், 1940-யில் லெக்ஸ் லூத்தர் என்ற வில்லன் கதாபாத்திரத்தை உருவாக்கினார்கள். அவர்தான் சூப்பர்மேனின் பிரதான எதிரி. மிக திறமையான இந்த வில்லன் கதபாத்திரத்தை உருவாக்கிய பின்தான், சூப்பர் மேனையும் அசாதாரணமான வீரனாக உருவாக்கினார்கள். சூப்பர் மேனுக்கு பறக்கும் சக்தி உட்பட பல சக்திகள் வந்தன. இப்படி மிக பிரபலமாக, காமிக் உலகில் வளர்ந்து வந்த சூப்பர் மேனை 1992-ஆம் ஆண்டு கொன்றுவிட்டார்கள். அதற்கு வாசகர்கள் கடும் எதிர்ப்பு தெரிவிக்கவே, மீண்டும் சூப்பர்மேன் உயிர்த்தெழுந்தார்.

காமிக் உலகை பல ஆண்டு காலம் ஆண்ட சூப்பர் மேன், 1951-ஆம் ஆண்டு ‘சூப்பர் மேன் அண்ட் மோல் மென்’ என்ற படத்தின் மூலம் திரைத்துறையில் நுழைந்தார். வெறும் ஐம்பத்தெட்டு நிமிடம் மட்டும் ஓடும் இந்த படத்தில் கதாநாயகனாக நடித்தவர் ஜார்ஜ் ரீவ்ஸ். ஆனால் முதல் முழு நீள சூப்பர்மேன் படம் 1978-ஆம் ஆண்டுதான் வெளியானது. ‘சூப்பர்மேன்’ என்று பெயரிடப்பட்ட இந்த படத்தில் சூப்பர்மேனாக கிரிஸ்டோபர் ரீவ்ஸ் நடித்திருந்தார். இன்றளவும், சூப்பர்மேன் கதாபாத்திரம் என்றதும் உடனே நினைவுக்கு வரும் நடிகர் இவர்தான். இவர் மொத்தம் நான்கு படங்களில் சூப்பர் மேனாக நடித்திருக்கிறார். இவர் நடித்து 1987 ஆம் ஆண்டு வெளிவந்த சூப்பர்மேன் நான்காம் பாகம் சரியாக ஓடாததால், கிட்டதட்ட இருபது வருடங்கள் சூப்பர்மேனை நம்மால் சினிமாவில் பார்க்கமுடியவில்லை. 2006-யில், சூப்பர்மேன் ரிடர்ன்ஸ் என்ற படத்தின் மூலம் மீண்டும் திரையில் தோன்றினார் சூப்பர்மேன். அந்த படத்தின் வெற்றி தந்த நம்பிக்கையில், மேன் ஆப் ஸ்டீல் படத்தை எடுத்துள்ளனர். மேன் ஆப் ஸ்டீல் படத்தில் நவீன சூப்பர்மேனாக வாழ்ந்திருப்பவர் ஹென்றி காவில்.

இதற்கிடையில் 1984-யில் சூப்பர்கேர்ள் என்றொரு படமும் வந்தது. ஆனால் படம் சரிவர ஓடவில்லை. சூப்பர் மேன் படங்களிலேயே அதிக நஷ்டத்தை சந்தித்த படமும் இதுதான். இதுவரை வெளிவந்த சூப்பர் மேன் படங்களில் வசூலை வாரி குவித்த படம் 1978-ஆம் ஆண்டு வெளிவந்த ‘சூப்பர்மேன்’ என்ற படமே. சூப்பர் மேன் ரிடர்ன்ஸ் என்ற படமும் பெரிய அளவில் லாபம் ஈட்டியது. இந்த சாதனையை மேன் ஆப் ஸ்டீல் நிச்சயம் முறியடித்துவிடும். அந்த அளவிற்கு மேன் ஆப் ஸ்டீல் பாக்ஸ் ஆபிசில் சக்கை போடு போடுகிறது.

சூப்பர் மேன் கதாபாத்திரத்தை கடவுளின் வடிவமாக கருதுபவர்களும் அமெரிக்காவில் இருகிறார்கள். பொதுவாக, சூப்பர் மேன் யாரையும் கொலை செய்ய மாட்டார். ஆனால், மேன் ஆப் ஸ்டீல் படத்தின் இறுதியில் வில்லனை கொன்று விடுகிறார். இதனால், சூப்பர் மேனின் புனித தன்மை கெட்டுவிட்டதாக பலர் எதிர்ப்பு குரல் எழுப்புகின்றனர்.

என்னதான் சூப்பர் மேன் அமெரிக்காவின் கலாசார சின்னமாக கருதப்பட்டாலும், சூப்பர்மேன் படங்களில் நடிக்க பலர் தயங்குகின்றனர். சூப்பர் மேன் படங்களில் நடிப்பவர்களுக்கு ஏதாவது அசம்பாவிதம் நேரும் என்றொரு நம்பிக்கை நிலவுவுவதே அதற்கு முக்கிய காரணம். சூப்பர் மேனாக நடித்த பலர் அகால மரணம் அடைந்துள்ளனர். ஜார்ஜ் ரீவ்ஸ் குண்டடி பட்டு இறந்தார். கிறிஸ்டோபர் ரீவ்ஸ், குதிரையில் இருந்து கீழ் விழுந்து பாரலைஸ் ஆகி இறந்தார். இதெல்லாம் மூட நம்பிக்கை என்கிறார் சூப்பர்மேன் ரிடர்ன்ஸ் படத்தில் நடித்த பிராண்டன் ரூத்.

எது எப்படி இருந்தாலும், உலகின் மற்ற சூப்பர் ஹீரோக்களுக்கெல்லாம் முன்னோடியான சூப்பர் மேனுக்கு மவுசு என்றுமே குறையாது என்பதற்கு சான்றுதான் மேன் ஆப் ஸ்டீல் படத்திற்கு கிடைத்திருக்கும் வரவேற்ப்பு. இந்த படம், டேவிட் கோயர், நோலன், ஜாக் ஸ்னைடர் போன்ற பல பிரபல படைப்பாளிகளின் தனித்திறமையால் உருவானது. அவர்கள் இணைந்து சூப்பர்மேனுக்கு நவீன வடிவம் கொடுத்திருக்கிறார்கள். சூப்பர்மேனின் ஆடையையும் மாற்றி வடிவமைத்திருக்கிறார்கள். அதனால் இன்னும் தரமான சூப்பர் மேன் படங்களை வருங்காலத்தில் எதிர்பார்க்கலாம். இரண்டு தலைமுறைக்கு மேல் ஆட்சி செய்து வரும் சூப்பர்மேன், அடுத்த தலைமுறையை கட்டி போட்டாலும் ஆச்சர்யப்படுவதற்கில்லை.

சினிமா மேட் இன் சீனா

உலகிலேயே அதிக படங்கள் தயாரிக்கும் நாடுகளின் பட்டியலில் மூன்றாவது இடத்தில் இருக்கும் நாடு சீனா. அமெரிக்காவும் இந்தியாவும் முறையே முதல் மற்றும் இரண்டாம் இடத்தில் இருக்கின்றன. சீனாவில் படைப்பு சுதந்திரம் குறைவு என்பதால், சீன ரசிகர்களின் எதிர்பார்ப்பை சீன படைப்பாளிகளால் பூர்த்திசெய்ய முடியவில்லை. அதனால் சீனர்கள் ஹாலிவுட்டை ஆதரிக்கத் தொடங்கிவிட்டனர். விளைவு, சீனாவில் ஆண்டுக்கு பல நூறு படங்கள் தயாரிக்கப்பட்டாலும், சீனா அதிகம் கல்லாக் கட்டுவது ஹாலிவுட் படங்களின் மூலமே..

1960-களில் சீனாவில் நடந்த கலாச்சார புரட்சியின் விளைவு, அங்கு பெரும்பாலான பழைய சீன படங்கள் தடை செய்யப்பட்டது. வெளிநாட்டுப் படங்களை சீனாவில் திரையிட முடியாத நிலை ஏற்பட்டது. புதிதாக எடுக்கப்படும் படங்களுக்கும் நிறைய கட்டுபாடுகள் விதிகப்பட்டது. 1980-களுக்கு பின் இந்த நிலை கொஞ்சம் கொஞ்சமாக மாறியது. திரைப்படத்துறையின் மீது இருந்த கட்டுபாடுகள் தளர்ந்தன.

1994-யில் ஹாலிவுட் படங்களுக்கு சீனாவின் கதவு மீண்டும் திறக்கப்பட, அன்று முதல் இன்று வரை டைட்டானிக், அவதார், அயன் மேன், லைப் ஆப் பை என பல பிரபலமான அமெரிக்கப் படங்கள் சீன மொழியில் வெளியாகி வருகிறது. இதன்மூலம் அமெரிக்கா சீனா இரண்டுமே பல ஆயிரம்கோடி வருமானம் ஈட்டுகிறது.

ஆண்டொன்றுக்கு சீனாவில் 34 அந்நியப் படங்கள் அனுமதிக்கப்படுகின்றன. அந்த 34 படங்களில் தங்கள் படமும் ஒன்றாக இருக்கவேண்டும் என்று பிரபல ஹாலிவுட் திரைப்பட நிறுவனங்கள் ஒவ்வொன்றும் போட்டி போடுகின்றன. ஆனால் எந்த வெளிநாட்டு படமாக இருந்தாலும், சீனத் திரைப்பட தணிக்கைக் குழுவால் தணிக்கை செய்யப் பட்ட பிறகுதான் சீனாவில் வெளியிட முடியும்.  அதில் அவர்கள் வன்முறை காட்சிகள், கோரக் காட்சிகள், சீனர்களுக்கு எதிரான காட்சிகள் என சீனாவிற்கு ஒவ்வாத காட்சிகள் எது இருந்தாலும் நீக்கி விடுவார்கள்.

அமெரிக்கத் தணிக்கைக்கு கடும் எதிர்ப்பு தெரிவிக்கும் க்வெண்டின் டரண்டினோ போன்ற இயக்குனர்கள் கூட, சீனாவின் தணிக்கைக் குழுவிற்கு கட்டுப்பட்டு செல்கிறார்கள். டரண்டினோவின் சமீபத்திய படமான ஜாங்கோவின் சீன மொழிப்பெயர்ப்பில் பல வன்முறை காட்சிகள் நீக்கப்பட்டுவிட்டன.

இன்றளவும் சீனர்களை வில்லன்களாகவும், சீனாவை சாத்தான்களின் பூமியாகவும்  சித்தரிக்கும் ஹாலிவுட் படங்கள் வந்துக் கொண்டுதான் இருக்கின்றன. அவ்வாறான படங்களை சீனாவில் எப்படி வெளியிடுவது? அதற்கும் வழி வந்துவிட்டது. பல கோடிகளை இறைத்து, நவீன தொழில்னுட்பத்தின் உதவியுடன் படத்தில் இடம்பெறும் சீன வில்லன்களை கொரியன் வில்லன்கள் போல் மாற்றிவிடுகின்றனர். கடந்த ஆண்டு வெளியான ரெட் டான் (Red Dawn) திரைப்படத்தில் ஹாலிவுட் இதனை செய்தது. கிராபிக்ஸில் எல்லாமே சாத்தியமாகிவிடுகிறது. பின் சீனாவின் ஒப்புதலோடு அந்த படங்களை அங்கே வெளியிடுகின்றனர்.

உலகத்திலேயே அதிக படங்களை தயாரிக்கும் அமெரிக்கா, பாக்ஸ் ஆபிசில் முதல் இடம் வகிக்கும் அமெரிக்கா, ஏன் இவ்வளவு மெனக்கெட வேண்டும் என்ற கேள்வி எழலாம். அமெரிக்காவில் எடுக்கப்படும் படங்கள் வெறும் அமெரிக்க பாக்ஸ் ஆபிசை மட்டுமே நம்பினால், லாபம் பார்க்க முடியாது. ஒரு நாட்டில், திரைப்பட டிக்கெட்களை விற்பதன் மூலம் வரும் வருவாயே பாக்ஸ் ஆபிஸ் எனப்படுகிறது.

உலக பாக்ஸ் ஆபிசில் சீனா இரண்டாம் இடம் வகிக்கிறது. இதற்க்கு முன் இரண்டாம் இடம் வகித்த ஜப்பான், இப்போது மூன்றாம் இடத்திற்கு தள்ளப்ப்பட்டுவிட்டது. அதிக மக்கள் தொகை கொண்ட சீனாவின் பாக்ஸ் ஆபிசை குறிவைத்தே ஹாலிவுட் சீனாவிற்கு கட்டுப்பட்டு செல்கிறது. 2.7 பில்லியன் டாலர் மதிப்புள்ள சீன பாக்ஸ் ஆபிசை அமெரிக்கா இழக்கத் தயாராக இல்லை.

மேலும், பல ஹாலிவுட் படங்கள் அமெரிக்காவை விட சீனாவில் அதிக வருமானம் ஈட்டுகிறது. ஹாலிவுட் இயக்குனர் கேமரூனுக்கு சீனாவில் ரசிகர்கள் அதிகம். அவர் இயக்கத்தில் வெளிவந்து வெற்றிபெற்ற டைட்டானிக் முப்பரிமான வடிவம்பெற்று கடந்த ஆண்டு சீனாவில் வெளியிடப்பட்டது. உலகளவில், டைட்டானிக்-3D ஈட்டிய லாபத்தில் பெரும்பங்கு சீனாவில் இருந்துதான் வந்தது.

டைட்டானிக்கை விட அவதார் சீனர்களை சற்று அதிகமாகவே கவர்ந்துவிட்டது எனலாம். சீனாவின் ஜாங்க்ஜியாஜி (Zhangjiajie) தேசிய பூங்காவில் உள்ள மலை ஒன்றிற்ற்கு, ‘அவதார் மலை’ என பெயர் வைக்கும் அளவிற்கு அவதார் அங்கே சக்கை போடு போட்டது.

சீனர்களின் இந்த ஹாலிவுட் மோகத்தை அமெரிக்கா பயன்படுத்திக்கொள்ள நினைக்கிறது. அதனால்தான் சீனர்களுக்கு எதிரான காட்சிகளை நீக்குவது மட்டுமல்லாமல், சீனர்களை கவர்வதற்கென்றே பிரத்யேகமாக காட்சிகளை சேர்க்கவும் செய்கிறார்கள். சமீபத்தில் வெளியான அயன் மேன்-3 சீன வெளியீட்டில், பிரபல சீன நடிகை பான் பிங்பிங்கை சிறு வேடத்தில் நடிக்க வைத்துள்ளனர். மேலும் சீன நடிகர் வாங் நடித்த காட்சிகளையும் நீட்டித்துள்ளனர். இவை முழுக்க முழுக்க சீன ரசிகர்களை கவர்வதற்காக செய்யப்பட்ட ஒன்று.  அமெரிக்க வடிவத்தில் பான்பிங்பிங் நடித்த காட்சிகள் இடம்பெறவில்லை என்பது குறிப்பிடத்தக்கது.

இவை ஒரு புறம் இருக்க, சீன மொழியிலும் சில தரமான படங்கள் எடுக்கப்பட்டாலும் அவை உலக அளவில் பெரிதாக கவனிக்க படவில்லை. சீனாவில் நிறைந்திருக்கும் கட்டுப்பாடுகளே அதற்கு முக்கிய காரணம். இப்போது சீனாவில் அமெரிக்க படங்களை அனுமதிப்பதன் மூலம், சீனபடங்கள் உலக அளவில் கொண்டு செல்லப்படும் அமெரிக்க நிறுவனங்களின் மூலம். இது சீன சினிமாவையும் உலக அளவில் பேச வைக்கும்.

இந்தனை ஆண்டுகள் இல்லாத அளவுக்கு இப்போது மட்டும் ஏன் ஹாலிவுட் இவ்வளவு பிரயத்தனப்படுகிறது  ? நம்ம ஊர் பர்மாபஜார் போல் சீனாவிலும் டி.வி.டி மார்கெட் உண்டு. அங்கே எல்லா பிரபலமான ஹாலிவுட் படங்களும் சப்டைட்டில்களோடு கிடைக்கிறது. அதை பல கோடி மக்கள் விரும்பி வாங்குகின்றனர். எவ்வளவு முயன்றும் இதனை தடுக்கமுடியவில்லை. திருட்டு டி.வி.டிகளின் மூலம் யாரோ சிலர் லாபம் அடைவதைவிட , ஹாலிவுட்டே படத்தை நேரடியாக வெளியிட்டால் பல்லாயிரம் கோடி லாபம் பார்க்கலாம். அதனால் தான் ஹாலிவுட் இவ்வளவு தூரம் இறங்கி வந்திருக்கிறது. சீனாவின் தணிக்கை குழு என்ன சொன்னாலும் தலையாட்டுகிறது.

ஹாலிவுட் மட்டும் அல்ல, பாலிவுட் படங்களுக்கும் சீனாவில் மவுசு கூடியுள்ளது. 3 இடியட்ஸ் படம் அங்கே சூப்பர் ஹிட். ராக்ஸ்டார் திரைப்படம் தாய்வான் டி.வி.டி மார்கெட்டில் மிகப்பிரபலம். இந்திய சீன அரசியல் காழ்ப்புணர்ச்சிகளை தாண்டி பாலிவுட் சீனாவில் எவ்வாறு ஜொலிக்கப் போகிறது என்பதை பொறுத்திருந்துதான் பார்க்க வேண்டும்.

சீனா இவ்வளவு வேகமாக பாக்ஸ் ஆபிசில் வளர்ந்தால், சீனவிற்க்கென்று படங்களின் காட்சிகள் மாற்றப்படும் காலம் மறைந்து, சீனவிற்க்கென்றே பிரத்யேகமாக படங்களை தயாரிக்கும் காலம் விரைவில் வந்திடும். உலகத் திரைப்படத்துறையை சீனாவே கட்டுப்படுத்தும் காலமும் வரலாம். ‘Made in china’ முத்திரையோடு படங்கள் வந்தாலும் ஆச்சர்யப்படுவதற்கில்லை…

ஆஸ்கார் 2013

நன்றி, ஆழம். ஏப்ரல் 2013

இதுவரை இல்லாத அளவிற்கு ஆஸ்கார் விருதுகளுக்கு இந்தாண்டு எதிர்பார்ப்பு அதிகமாயிருந்தது. விருதுக்கு பரிந்துரைக்கப்பட்டவர்களில் பெரும்பாலனோர் இதற்க்கு முன் ஆஸ்கார் விருதுகளை வாங்கியவர்கள் என்பதே அதற்க்கு காரணம். தேர்ந்தெடுக்கப்பட்ட அனைத்து படங்களும் ஏதோ ஒருவகையில் சிறந்த படங்கள் எனினும், சில படங்கள் அதிக பாராட்டுகளைப் பெற்றது. அவை இங்கே..

ஆர்கோ (ARGO)

சிறந்த திரைப்படமாக தேர்ந்தெடுக்கப்பட்ட ஆர்கோவை இயக்கியர் பென் அஃப்லெக். இந்தப்படத்தின் கதாநாயகனும் இவரே. நடிகர், திரைக்கதையாசிரியர், இயக்குனர் என பன்முகம் கொண்ட இவர், இதற்க்கு முன் ‘குட் வில் ஹன்டிங்’ என்ற படத்திற்காக சிறந்த திரைக்கதையாசிரியர் விருதை வாங்கியுள்ளார். ஆர்கோ ஒரு உண்மை சம்பவத்தை தழுவி எழுதப்பட்டது. 1979-ஆம் ஆண்டு ஈரானில் புரட்சி வெடிக்கிறது. அங்கிருக்கும் அமெரிக்க தூதரக அதிகாரிகள் கொல்லப்படுகிறார்கள்.  அவர்களிடமிருந்து தப்பிக்கும் ஆறு அமெரிக்கர்கள் ஈரானிலேயே பதுங்கிக்கொள்கிறார்கள். அவர்களை தன் புத்தி சாதுரியத்தால் அங்கிருந்து தப்பிக்க வைக்கிறார் கதாநாயகன். அமெரிக்க உளவுத்துறை அதிகாரியான கதாநாயகன், தான் ஒரு திரைப்பட இயக்குனர் என்று கூறிக்கொண்டு ஈரானுக்குள் நுழைகிறார். ஈரான் போராளிகளை நம்பவைத்து,  அந்த ஆறு அதிகாரிகளையும் மீண்டும் அமெரிக்காவிற்கு எவ்வாறு அழைத்து வருகிறார் என்பதே படத்தின் சுவாரஸ்யமான திரைக்கதை. ஆர்கோ படத்திற்காக தத்ருபமாக காட்சிகளை எழுதி சிறந்த தழுவல் திரைக்கதைக்கான விருதை பெற்று விட்டார் திரைக்கதையாசிரியர் கிறிஸ் டெர்ரியோ. சிறந்த படத்தொகுப்புகான விருதும் ஆர்கோ படத்திற்கே கிட்டியது.

ஜாங்கோ அன்செயின்ட் (Django Unchained)

சமகால உலக சினிமாவில் தவிர்க்க முடியாத ஒரு ஆளுமை க்வெண்டின் டரண்டினோ. ஹாலிவுட் திரைக்கதை உத்திகளை தன் படங்களின் மூலம் உடைத்து எறிவது இவர் வழக்கம். ஜாங்கோ படத்தை எழுதி இயக்கிய இவருக்கு  இப்படத்திற்காக சிறந்த திரைக்கதையாசிரியர் விருது கிட்டியுள்ளது. பத்தொம்பதாம் நூற்றாண்டில் அமெரிக்காவில் நிலவிய அடிமை வர்த்தகத்தை பற்றிய கதை இது. கருப்பின மக்கள் அமெரிக்கர்களால் அடிமைகளாக நடத்தப்படுகின்றனர். அதில் ஒரு அடிமையான ஜாங்கோவை விடுவிக்கிறார் ஜெர்மனிய பல்மருத்துவர் கிறிஸ்டோபர்.  சில வில்லன்களை பழிவாங்க ஜாங்கோ தனக்கு உதவினால், ஜாங்கோவின் காதலியை அமெரிக்கர்களிடமிருந்து மீட்டுதருவதாக வாக்களிக்கிறார் கிறிஸ்டோபர். இருவரும் வில்லன்களை தேடி புறப்படுகின்றனர். வழியெங்கும் உருவெடுக்கும் பிரச்சனைகளை சேர்ந்து சமாளிக்கின்றனர். இறுதியில் நிகழும் எதிர்பாராத திருப்பங்களே மீதிக்கதை. கிறிஸ்டோபர் கதாபாத்திரத்தில் மிகச் சிறப்பாக நடித்திருந்த கிறிஸ்டோப் வால்ட்ஸ் சிறந்த துணைநடிகருக்கான ஆஸ்கார் விருதை பெற்றதில் ஆச்சர்யம் ஒன்றும் இல்லை. அமெரிக்கர்கள் மறைக்க முயலும் ஒரு கருப்பு சரித்திரத்தையே தான் கற்பனை கலந்து படமாக்கிருப்பதாகவும், இப்படம் விவாதிக்கப்பட வேண்டிய ஒன்று எனவும் டரண்டினோ கூறிவருவது குறிப்பிடத்தக்கது.

லைஃப் ஆஃப் பை  (Life of pi)

எதிர்பார்த்ததை போன்றே ‘லைஃப் ஆஃப் பை’ அதிக விருதுகளை குவித்துவிட்டது. சிறந்த ஒளிப்பதிவு, சிறந்த இயக்குனர், சிறந்த visual effects, சிறந்த இசை என நான்கு விருதுகள் இத்திரைப்படத்திற்கு கிட்டியுள்ளது. ஒரு படகில் ஒரு புலியுடன் கடலின் மத்தியில் மாட்டிக்கொள்ளும் பை என்ற சிறுவனின் போராட்டமே இப்படத்தின் கதை. யான் மார்டல் எழுதிய நாவலை தழுவி இதனை படமாக இயக்கியிருப்பவர் ஆங்லீ. லைஃப் ஆஃப் பை நாவலை படமாக எடுக்க பலர் தயங்கினர். ஏனெனில், இக்கதை மிகவும் வித்தியாசமானது. வெறும் ஒரு சிறுவனையும் புலியையும் வைத்துக்கொண்டு எப்படி சுவாரஸ்யமான படம் எடுப்பது என்ற அச்சம் பல பெரிய இயக்குனர்களுக்கு இருந்தது உண்மை. ஆனால் ஆங் லீ  அந்நாவலை சிறந்த படமாக இயக்கி சிறந்த இயக்குனருக்கான விருதையும்  பெற்றுவிட்டார். இது இவருக்கு இரண்டாவது ஆஸ்கார். இதற்கு முன் ப்ரோக் பேக் மௌன்டைன் என்ற படத்திற்கு சிறந்த இயக்குனர் விருதை பெற்ற இவர், ஆசியாவிலேயே ஆஸ்கார் விருதை பெற்ற ஒரே இயக்குனர் என்பது குறிப்பிடத்ததக்கது.

சில்வர் லைனிங்ஸ் ப்லேபுக் (Silver Linings Playbook)

மனதில் எழும் எதிர்மறை எண்ணங்களை, எப்படி நமக்கு சாதகமாக பயன்படுத்திக் கொண்டு வாழ்க்கையில் ஜெயிப்பது என்பதை நகைச்சுவை கலந்து சொல்லிய படம் இது. ‘பைபோலார் டிஸார்டர்’ என்ற ஒருவகை மனநோயால் பாதிக்கப்பட்ட கதாநாயகன் பேட் மனநல காப்பகத்தில் சேர்க்கப்படுகிறார். எட்டு மாதத்திற்கு பின் மனநல காப்பகத்தில் இருந்து வெளியே வரும் பேட், மீண்டும் தன் மனைவி நிக்கியுடன் சேர்ந்து வாழ முயற்சி செய்கிறார். ஆனால் நிக்கியை கண்டுபிடிக்க முடியவில்லை. அடிக்கடி ஆக்ரோஷமான மனநிலைக்கு சென்றுவிடும் பேட்டுடன் சேர்ந்து வாழ நிக்கிக்கு உடன்பாடு இல்லை. அதனால் நிக்கியை பேட் சந்திக்கக்கூடாது என்று கோர்ட் தடை விதித்துவிட, நிக்கியிடம் பேச நிக்கியின் தோழி டிஃபானியின் உதவியை நாடுகிறார் பேட். இதற்க்கிடையே டிஃபானி பேட்டை  காதலிக்க தொடங்கிவிடுகிறார். இறுதியில் யார் யாரோடு இணைந்தார்கள் என்பதை மிகவும் சுவாரஸ்யமாக விவரித்திருக்கும் படம் இது. தலை சிறந்த நடிகர் ராபர்ட் டி நிரோ தொடங்கி இந்திய நடிகர் அனுபம் கேர் வரை பெரிய ஸ்டார் பட்டாளமே படத்தில் உண்டு. டிஃபானி கதாப்பாத்திரத்தில் நடித்த ஜெனிபர் லாரன்ஸ் சிறந்த நடிகைக்கான ஆஸ்கார் விருதை தட்டிச் சென்றார்.

லிங்கன் (Lincoln)

அமெரிக்காவின் முன்னால் பிரதமர் ஆபிரகாம் லிங்கனின் கடைசி நான்கு மாத வாழ்க்கையை பற்றிய படம் ‘லிங்கன்’. கறுப்பின மக்களை அடிமைகளாக நடத்தும் முறையை முழுவதுமாக ஒழிக்கும் பொருட்டு  அமெரிக்க நாடாளுமன்றத்தில் பதிமூன்றாவது சட்டதிருத்தம் கொண்டு வர லிங்கன் போராடுகிறார். சட்டத்திருத்தம் கொண்டுவர எதிர்கட்சிகள் எதிர்ப்பு தெரிவிகின்றன. சிலர் உடனிருந்தே குழி பறிக்க முயல்கின்றனர். அனைவரின் எதிர்ப்புகளையும் எதிர்கொண்டு, இறுதியில் பெரும்பான்மையினரின் ஆதரவோடு சட்டத்திருத்தத்தை கொண்டுவருகிறார் லிங்கன். இப்படத்தை இயக்கியவர் பிரபல இயக்குனர் ஸ்டீபன் ஸ்பீல்பெர்க். லிங்கனாக நடித்திருப்பவர் டேனியல் டே லெவிஸ். தன் ‘Method acting’ திறமை மூலம் இவர் லிங்கனாகவே வாழ்ந்து, சிறந்த நடிகருக்கான ஆஸ்கார் விருதை வென்று விட்டார். லிங்கன் ஒரு பீரியட் திரைப்படம். இப்படத்தின் கலை இயக்குனர்கள் தத்ரூபமாக கலை வடிவம் கொடுத்திருந்ததனால், சிறந்த தயாரிப்பு வடிவமைப்பு விருதும் லிங்கன் திரைப்படத்திற்க்கே கிடைத்துள்ளது.

தி மிசெரபில்ஸ் (Les Miserables)

இது ஒரு ம்யுசிகல் திரைப்படம். ம்யுசிகல் எனில், படத்தில் இசை ஒரு முக்கிய அங்கம் வகிக்கும். படத்தில் வரும் கதாபாத்திரங்கள் யாரும் வசனங்களை பேசமாட்டார்கள். பாடுவார்கள். விக்டர் ஹுகோவின் ‘Les Miserables’ என்ற பிரெஞ்சு நாவலை, தழுவி அதே பெயரில் இயற்றப்பட்ட இசைநாடகம் மிக பிரபலம். அந்த இசை நாடகத்தை தழுவி படமாக எடுத்திருக்கின்றனர். பத்தொன்பது வருடம் சிறையில் இருந்துவிட்டு பரோலில் வெளியே வருகிறார் கதாநாயகன். திருடன் என்றும் திருடனாகத்தான் இருப்பான் என்ற முன்முடிவோடு அவரையே துரத்திக்கொண்டிருக்கிறார் ஒரு போலீஸ் அதிகாரி. கதாநாயகன் செல்லும் இடமெல்லாம் பின்தொடர்கிறார் அதிகாரி. திருந்தி வாழும் கதாநாயகன் ஃபாண்டின்  என்ற பெண்ணுக்கு உதவுகிறார். அவளது மரணத்திற்கு பின் அவளின் பெண்ணை தத்தெடுத்துக்கொள்கிறார். பிறருக்கு உதவும் குணம் கொண்ட கதாநாயகனை அனைவரும் மதிக்கிறார்கள், அந்த போலீஸ் அதிகாரியை தவிர. கதாநாயகனுக்கும் போலீஸ் அதிகாரிக்கும் நடக்கும் போரட்டத்தில் யார் வெற்றிபெற்றார்கள் என்பதை பிரெஞ்சு புரட்சியின் பின்னனியில் சொல்லியிருகின்றனர். மிக பிரம்மாண்டமாக எடுக்கப்பட்ட இப்படம், எட்டு ஆஸ்கார் விருதுகளுக்கு பரிந்துரைக்கப்பட்டு மூன்று விருதுகளை வென்றது. சிறந்த துணை நடிகைக்கான விருதை ஃபாண்டின் கதாபாத்திரத்தில் நடித்த ஆனா ஹாத்வே பெற்றார். சிறந்த ஒப்பனை, சிறந்த சவுண்ட் மிக்ஸிங் விருதும் இப்படத்திற்க்கே கிட்டியது.

ஸ்கைஃபால் (Skyfall)

பாண்ட், ஜேம்ஸ் பாண்ட் மீண்டும் கலக்கிய படம். தொலைந்து போன ஹார்ட் டிஸ்க்கை பாண்ட் எவ்வாறு கண்டுபிடிக்கிறார் என்பதே இப்படத்தின் கதை. இதுவரை பாண்ட் கதாப்பாத்திரங்களில் நடித்த நடிகர்களை விட இப்படத்தில் டேனியல் கிரேக் சிறப்பாக நடித்திருந்தார். சிறந்த ஒளிப்பதிவிற்க்கான விருது இப்படத்திற்கு பெரிதும் எதிர்ப்பார்க்கப்பட்டது. படத்தின் ஒளிப்பதிவாளர் ரோஜர் டீக்கின்ஸ் ரயில் பெட்டிகள், நீர் நிலைகள் என பல மூளை முடுக்குகளில் புகுந்து மிகவும் திறம்பட ஒளிப்பதிவு செய்திருந்தார். எனினும் ‘லைஃப் ஆஃப் பை’  படத்தின் ஒளிப்பதிவு சற்று அதிக சவால் நிறைந்தது என்பதால்  சிறந்த ஒளிப்பதிவாளர் விருதை ‘லைஃப் ஆஃப் பை’ படத்திற்காக ஒளிப்பதிவாளர் கிளாடியோ மிராண்டா தட்டி சென்றுவிட்டார்.  சிறந்த பாடலுக்கான விருது ஸ்கைஃபால் படத்தில் இடம்பெற்ற “ஸ்கைஃபால்” என்ற பாடலுக்கு கிட்டியது. ‘லைஃப் ஆஃப் பை’ படத்தில் தாலாட்டு பாடலை பாடிய இந்திய பாடகி பாம்பே ஜெயஸ்ரீயும் இந்தவிருந்திற்கு பரிந்துரைக்கப்பட்டிருந்தார்.ஆனால் பாண்ட் வென்றுவிட்டார். சிறந்த சவுண்ட் எடிட்டிங்க்கான விருதும் ஸ்கைஃபால் படத்திற்கே கிட்டியது.

அமூ (Amour)

சிறந்த அந்நிய மொழி திரைப்படத்திற்க்கான விருதை இந்தமுறை பெற்றது, அமூ என்ற பிரெஞ்சு திரைப்படம். ‘Amour’ என்ற பிரெஞ்சு சொல்லிற்கு காதல் என்று பொருள். காதலுக்கு வயதில்லை என்பதிற்கிணங்க, வயதான தம்பதியின் காதலை கவித்துவமாக சொல்கிறது இத்திரைப்டம். என்பது வயதை கடந்த ஜார்ஜ்-ஆனா தம்பதியரின் வாழ்க்கை அமைதியாக சென்றுகொண்டிருக்கிறது, திடிரென ஒரு நாள் ஆனாவின் உடல் நலம் குன்றிப் போய் வாழ்க்கை முழுவதும் படுக்கையிலேயே கழிக்க வேண்டும் என்ற கட்டாயம் ஏற்படுகிறது. கொஞ்சம் கொஞ்சமாக இறந்துக் கொண்டிருக்கும் மனைவியை ஜார்ஜ் எப்படி பராமரிக்கிறார் என்பதே மீதிக் கதை. முழுக்க முழுக்க ஒரு வீட்டினுள்ளேயே இக்கதை நகர்கிறது. மனைவியின் மீது அளவற்ற பாசம் வைத்திருக்கும் ஒரு கணவனின் காதலை இதைவிட உணர்ச்சிபூர்வமாக யாராலும் சொல்லிவிடமுடியாது.

மொத்தத்தில், இந்த முறை ஆஸ்கார் வென்ற ஒவ்வொரு படமும் ஒவ்வொரு வகையை சார்ந்தவை. அவற்றில் பல, மிக பிரம்மாண்டமான படங்கள்.விருதுக்கு பரிந்துரைக்கப்பட்ட பலரும் மிகவும் திறமைசாலிகள். ஆனால் மிகவும் எதிர்பார்க்கப்பட்ட சிலருக்கு விருது கிடைக்காதது ஆச்சர்யத்தை அளித்தது. அடுத்த ஆஸ்கார் என்னென்ன ஆச்சர்யங்களை ஒளித்துவைத்திருக்கிறது என்பதை பொறுத்திருந்து பார்ப்போம்.